“ಮೋದಿಯವರ ಪ್ರವಾಸ ರದ್ದಾದಾಗ ಎಚ್ಚರಿಕೆ ನೀಡಿದ್ದರೆ 26 ಪ್ರವಾಸಿಗರ ಜೀವ ಉಳಿಸಬಹುದಿತ್ತು” – ಖರ್ಗೆ ತೀವ್ರ ವಾಗ್ದಾಳಿ
ಹೊಸಪೇಟೆ, ಮೇ 21:
ಪ್ರಧಾನಿ ನರೇಂದ್ರ ಮೋದಿ ಗುಪ್ತಚರ ಮಾಹಿತಿಯ ಆಧಾರದ ಮೇಲೆ ತಮ್ಮ ಕಾಶ್ಮೀರ ಪ್ರವಾಸವನ್ನು ಏಪ್ರಿಲ್ 17ರಂದು ರದ್ದುಗೊಳಿಸಿದ್ದರೂ, ಸಾರ್ವಜನಿಕರಿಗೆ ಯಾವುದೇ ಎಚ್ಚರಿಕೆ ನೀಡಿಲ್ಲ. ಅದರಿಂದಾಗಿ ಏಪ್ರಿಲ್ 22ರಂದು ಪಹಲ್ಗಾಮ್ನಲ್ಲಿ ನಡೆದ ಉಗ್ರ ದಾಳಿಯಲ್ಲಿ 26 ಪ್ರವಾಸಿಗರು ಪ್ರಾಣ ಕಳೆದುಕೊಳ್ಳಬೇಕಾಯಿತು ಎಂಬ ಗಂಭೀರ ಆರೋಪವನ್ನು ರಾಜ್ಯಸಭೆ ವಿರೋಧ ಪಕ್ಷದ ನಾಯಕ ಮತ್ತು ಎಐಸಿಸಿ ಅಧ್ಯಕ್ಷ ಮಲ್ಲಿಕಾರ್ಜುನ ಖರ್ಗೆ ಮಾಡಿದ್ದಾರೆ.
ವಿಜಯನಗರ ಜಿಲ್ಲೆಯ ಹೊಸಪೇಟೆಯಲ್ಲಿ ಮಂಗಳವಾರ ನಡೆದ ಕಾಂಗ್ರೆಸ್ ಸಾಧನಾ ಸಮಾವೇಶದಲ್ಲಿ ಮಾತನಾಡಿದ ಖರ್ಗೆ, “ಪ್ರಧಾನಿ ಮೋದಿ ತಮ್ಮ ಪ್ರವಾಸವನ್ನು ರದ್ದುಗೊಳಿಸಿದರು ಎಂಬುದು ಗುಪ್ತಚರ ದುರಂತದ ಮುನ್ಸೂಚನೆ ಇದ್ದದ್ದರಿಂದ. ಹಾಗಿದ್ದಾಗ ಅವರು ಯಾಕೆ ಜನರಿಗೆ ಎಚ್ಚರಿಕೆ ನೀಡಲಿಲ್ಲ? ಯಾಕೆ ಪ್ರವಾಸಿಗರ ರಕ್ಷಣೆಗೆ ಕ್ರಮ ತೆಗೆದುಕೊಳ್ಳಲಿಲ್ಲ?” ಎಂದು ಪ್ರಶ್ನಿಸಿದರು.
ಖರ್ಗೆ ತಮ್ಮ ಭಾಷಣದಲ್ಲಿ ಕೇಂದ್ರ ಸರ್ಕಾರದ ಭದ್ರತಾ ವೈಫಲ್ಯವನ್ನು ತೀವ್ರವಾಗಿ ಆಕ್ಷೇಪಿಸಿದರು. “ಪಹಲ್ಗಾಮ್ ದಾಳಿಯಲ್ಲಿ ಯಾವುದೇ ಭದ್ರತಾ ಪಡೆಗಳಿಂದ ಪ್ರವಾಸಿಗರಿಗೆ ರಕ್ಷಣೆ ನೀಡಲಾಗಲಿಲ್ಲ. ಇದು ಕೇಂದ್ರದ ಗಂಭೀರ ನಿರ್ಲಕ್ಷ್ಯವನ್ನು ತೋರಿಸುತ್ತದೆ. ಮೋದಿ ಅವರು ಇವರೆಗೆ ಈ ಕುರಿತು ಒಂದು ಪದವೂ ಮಾತನಾಡಿಲ್ಲ, ಉತ್ತರಿಸಿಲ್ಲ,” ಎಂದು ಖರ್ಗೆ ಟೀಕಿಸಿದರು.
ಕಾಂಗ್ರೆಸ್ ಸರ್ಕಾರದ ಎರಡು ವರ್ಷ ಪೂರೈಸಿದ ಪ್ರಯುಕ್ತ ಆಯೋಜಿಸಲಾದ ಈ ಸಮಾವೇಶದಲ್ಲಿ ಖರ್ಗೆ ಪ್ರಧಾನಿಯನ್ನು ಮಾತ್ರವಲ್ಲದೆ, ಅವರ ನೇತೃತ್ವದ ಆಡಳಿತ ಶೈಲಿಯನ್ನೂ ಗಂಭೀರವಾಗಿ ಪ್ರಶ್ನಿಸಿದರು.
ವರದಿ: ಡಿ.ಪಿ. ಅರವಿಂದ್
ಸ್ಥಳ: ಹೊಸಪೇಟೆ
