15ರಂದು ಶಿವಮೊಗ್ಗದಲ್ಲಿ ‘ಆಳ್ವಾಸ್ ಸಾಂಸ್ಕೃತಿಕ ವೈಭವ–2025’: 300ಕ್ಕೂ ಹೆಚ್ಚು ಕಲಾವಿದರಿಂದ ಅದ್ಭುತ ಕಲಾರಂಗ
ಶಿವಮೊಗ್ಗ, ಡಿಸೆಂಬರ್ 09:
ಆಳ್ವಾಸ್ ನುಡಿಸಿರಿ ವಿರಾಸತ್ ಜಿಲ್ಲಾ ಘಟಕ, ಕರ್ನಾಟಕ ರಾಜ್ಯ ಸರ್ಕಾರಿ ನೌಕರರ ಸಂಘ ಮತ್ತು ಸ್ಟೇಟ್ ಬ್ಯಾಂಕ್ ಆಫ್ ಇಂಡಿಯಾ ಇವರ ಸಂಯುಕ್ತ ಸಹಭಾಗಿತ್ವದಲ್ಲಿ ಡಿಸೆಂಬರ್ 15ರಂದು ಸಂಜೆ 5.30ಕ್ಕೆ ಅಲ್ಲಮಪ್ರಭು ಬಯಲು ರಂಗ (ಫ್ರೀಡಂ ಪಾರ್ಕ್) ನಲ್ಲಿ ಆಳ್ವಾಸ್ ಸಾಂಸ್ಕೃತಿಕ ವೈಭವ–2025 ಅನ್ನು ಅದ್ಧೂರಿಯಾಗಿ ಆಯೋಜಿಸಲಾಗಿದೆ ಎಂದು ಸರ್ಕಾರಿ ನೌಕರರ ಸಂಘದ ರಾಜ್ಯಾಧ್ಯಕ್ಷ ಸಿ.ಎಸ್. ಷಡಾಕ್ಷರಿ ತಿಳಿಸಿದರು.
ಸೋಮವಾರ ಪತ್ರಿಕಾಗೋಷ್ಠಿಯಲ್ಲಿ ಮಾತನಾಡಿದ ಅವರು, “ಆಳ್ವಾಸ್ ಸಾಂಸ್ಕೃತಿಕ ವೈಭವ ನಮ್ಮ ದೇಶದ ಸಾಂಸ್ಕೃತಿಕ ಪರಂಪರೆ, ಕಲಾ ವೈವಿಧ್ಯ ಹಾಗೂ ಜನಪದ ಸೊಗಡುಗಳನ್ನು ಸೊಗಸಾಗಿ ಪ್ರದರ್ಶಿಸುವ ಅಪೂರ್ವ ವೇದಿಕೆ. ಈ ಬಾರಿಯೂ ಸುಮಾರು 300 ವಿದ್ಯಾರ್ಥಿ ಕಲಾವಿದರು ಮೂರು ಗಂಟೆಗಳ ಕಾಲ ಮನಮೋಹಕ ನೃತ್ಯ–ಸಂಗೀತ ಕಾರ್ಯಕ್ರಮಗಳನ್ನು ನೀಡಲಿದ್ದಾರೆ. ಶಿವಮೊಗ್ಗದ ಜನತೆಗೆ ಇದು ಅಪರೂಪದ ಕಲಾರಸಿಕರ ಹಬ್ಬ” ಎಂದರು.
ವೈವಿಧ್ಯಮಯ ಸಾಂಸ್ಕೃತಿಕ ತಾಣ… 3 ಗಂಟೆಗಳ ನಿರಂತರ ಕಲಾ ಸಪ್ತಾಹ
ಕಾರ್ಯಕ್ರಮದಲ್ಲಿ ಈ ಕೆಳಗಿನ ಪ್ರಮುಖ ಕಲಾಪ್ರಕಾರಗಳು ಪ್ರದರ್ಶನಗೊಳ್ಳಲಿವೆ:
-
ಯೋಗದೀಪಿಕ ಪ್ರದರ್ಶನ
-
ಶಾಸ್ತ್ರೀಯ ನೃತ್ಯಗಳ ಸಂಭ್ರಮ
-
ಬಡಗುತಿಟ್ಟು ಯಕ್ಷಗಾನ
-
ಯಕ್ಷಗಾನ – ಶ್ರೀರಾಮ ಪಟ್ಟಾಭಿಷೇಕ
-
ಗುಜರಾತಿನ ಗಾರ್ಭಾ ಮತ್ತು ದಾಂಡಿಯಾ ನೃತ್ಯ
-
ಮಣಿಪುರಿ ಸ್ಟಿಕ್ ಡ್ಯಾನ್ಸ್
-
ಮಲ್ಲಕಂಬ ಮತ್ತು ರೋಪ್ ಕಸರತ್ತು ಪ್ರದರ್ಶನ
-
ಸೃಜನಾತ್ಮಕ ನೃತ್ಯಗಳು
-
ಡೊಳ್ಳು ಕುಣಿತ
-
ಕಥಕ್ ನೃತ್ಯ – ವರ್ಷಧಾರೆ ಪ್ರದರ್ಶನ
-
ಪಶ್ಚಿಮ ಬಂಗಾಳದ ಪುರುಲಿಯಾ ತೆಂಕು ತಿಟ್ಟು ನೃತ್ಯ
-
ಬೊಂಬೆ ವಿನೋದಾವಳಿ (ಪಪೆಟ್ ಶೋ)
ಪ್ರತಿ ಕಲಾಪ್ರದರ್ಶನವು ಭಾರತದ ಸಂಘ–ಸಂಸ್ಕೃತಿಗಳ ವೈವಿಧ್ಯತೆ ಮತ್ತು ಕಲೆಗಳ ನಿಜಸ್ವರೂಪವನ್ನು ತೋರಿಸುವ ನಿಟ್ಟಿನಲ್ಲಿ ವಿಶೇಷವಾಗಿ ಆಯ್ಕೆ ಮಾಡಲಾಗಿದೆ.
10–15 ಸಾವಿರ ಜನಪ್ರವಾಹ ನಿರೀಕ್ಷೆ – ನಾಗರಿಕರಿಗೆ ಪ್ರಮುಖ ಸೂಚನೆ
ಕಾರ್ಯಕ್ರಮದ ಅಧ್ಯಕ್ಷ ಎಸ್.ಪಿ. ದಿನೇಶ್ ಹೇಳಿದರು:
“ಪ್ರವೇಶ ಸಂಪೂರ್ಣ ಉಚಿತ. ಕಾರ್ಯಕ್ರಮಕ್ಕಾಗಿ ಸುಮಾರು 15 ಸಾವಿರಕ್ಕೂ ಹೆಚ್ಚು ಆಸನ ವ್ಯವಸ್ಥೆ ಮಾಡಲಾಗಿದೆ. ಆದಾಗ್ಯೂ, ಕೆಲವರಿಗೆ ವಿಶೇಷ ಪಾಸ್ಗಳನ್ನು ನೀಡಲಾಗಿದೆ. ನಾಗರಿಕರು ಸರಿಯಾದ ಸಮಯಕ್ಕೆ ಬಂದು ಆಸೀನರಾಗುವುದರಿಂದ ಕಾರ್ಯಕ್ರಮದ ಸೊಗಸು ಇನ್ನಷ್ಟು ಹೆಚ್ಚುತ್ತದೆ. ಕಾರ್ಯಕ್ರಮ ಸಂಜೆ 5.30ಕ್ಕೆ ಖಚಿತವಾಗಿ ಆರಂಭವಾಗುತ್ತದೆ, ಮೊದಲ ಅರ್ಧ ಗಂಟೆ ಉದ್ಘಾಟನಾ ಸಮಾರಂಭಕ್ಕಾಗಿ ಮೀಸಲು.”
ಅವರು ಮುಂದುವರೆದು:
“6 ಗಂಟೆಯಿಂದ 9 ಗಂಟೆಯವರೆಗೆ ನಿರಂತರವಾಗಿ ಮೂವರು ಗಂಟೆಗಳ ನೃತ್ಯ–ಸಂಗೀತ ವೈಭವ ಜರುಗಲಿದೆ. ಸಾರ್ವಜನಿಕರು 10 ನಿಮಿಷ ಮುಂಚಿತವಾಗಿ ಬಂದು ಕುಳಿತುಕೊಳ್ಳಲು ಸಲಹೆ ನೀಡಿದ್ದೇವೆ. ಕುಡಿಯುವ ನೀರು ಹಾಗೂ ತಿಂಡಿ–ತಿನಿಸುಗಳನ್ನು ತಾವು ತರಬಹುದು. ಸ್ಥಳದಲ್ಲಿಯೇ ತಿಂಡಿ–ತಿನಿಸುಗಳ ಸ್ಟಾಲ್ಗಳ ವ್ಯವಸ್ಥೆಯೂ ಮಾಡಲಾಗಿದ್ದು, ಕಲಾರಸಿಕರಿಗೆ ಎಲ್ಲ ಸೌಲಭ್ಯಗಳನ್ನೂ ಕಲ್ಪಿಸಲಾಗಿದೆ” ಎಂದರು.
25ಕ್ಕೂ ಹೆಚ್ಚು ಸಂಘ–ಸಂಸ್ಥೆಗಳ ಸಹಕಾರ
ಈ ಭವ್ಯ ಕಾರ್ಯಕ್ರಮಕ್ಕೆ ಜಿಲ್ಲಾ ಮಟ್ಟದ 25ಕ್ಕೂ ಹೆಚ್ಚು ಸಂಘ–ಸಂಸ್ಥೆಗಳು ಕೈಜೋಡಿಸಿದ್ದು, ಶಿಸ್ತುಬದ್ಧವಾದ ವ್ಯವಸ್ಥೆ, ವಾಹನ ನಿಲುಗಡೆ, ಕುಳಿತುಕೊಳ್ಳುವ ವ್ಯವಸ್ಥೆ, ಬೆಳಕು–ಧ್ವನಿವ್ಯವಸ್ಥೆ ಸೇರಿದಂತೆ ಎಲ್ಲಾ ವ್ಯವಸ್ಥೆಗಳನ್ನು ಕಟ್ಟುನಿಟ್ಟಾಗಿ ಮಾಡಲಾಗಿದೆ.
ನೇತೃತ್ವ ನೀಡಿದವರಲ್ಲಿ ಸಮನ್ವಯ ಕಾಶೀ, ಆರ್. ಮೋಹನ್ಕುಮಾರ್, ಬಳ್ಳೇಕೆರೆ ಸಂತೋಷ್, ಗೋಪಿನಾಥ್, ಅನಿತಾ ರವಿಶಂಕರ್, ಶಾಂತಾ ಸುರೇಂದ್ರ, ಪಾಪಣ್ಣ ಸೇರಿದಂತೆ ಅನೇಕರು ಉಪಸ್ಥಿತರಿದ್ದರು.
ವರದಿ: ಡಿ.ಪಿ ಅರವಿಂದ್
