ಬೆಂಗಳೂರಿನ ರವೀಂದ್ರ ಕಲಾಕ್ಷೇತ್ರದಲ್ಲಿ ಸಾಧಕರ ಸನ್ಮಾನ: ಶ್ರೀ ರಾಮಚಂದ್ರ ರಾವಜಿ ಅವರಿಗೆ 'ಅರಣ್ಯ ಸಂರಕ್ಷಕ' ಪ್ರಶಸ್ತಿ
ಬೆಂಗಳೂರು, ಮಾರ್ಚ್ 2, 2025: ಸಾಂಸ್ಕೃತಿಕ ಅಕ್ಯಾಡೆಮಿ, ಬೆಂಗಳೂರು, ರವರು ರವೀಂದ್ರ ಕಲಾಕ್ಷೇತ್ರದಲ್ಲಿ ವಿವಿಧ ಕ್ಷೇತ್ರಗಳಲ್ಲಿ ಸಾಧನೆ ಮಾಡಿದ ರಾಜ್ಯದ ಸಾಧಕರನ್ನು ಸನ್ಮಾನಿಸುವ ಒಂದು ಗೌರವಾನ್ವಿತ ಕಾರ್ಯಕ್ರಮವನ್ನು ಆಯೋಜಿಸಿದ್ದಾರೆ. ಈ ಕಾರ್ಯಕ್ರಮದಲ್ಲಿ ಪರಿಸರ ಸಂರಕ್ಷಣೆ ಕ್ಷೇತ್ರದಲ್ಲಿ ಅಮೂಲ್ಯ ಸೇವೆ ಸಲ್ಲಿಸಿದ ಶ್ರೀ ರಾಮಚಂದ್ರ ರಾವಜಿ ಅವರಿಗೆ 'ಅರಣ್ಯ ಸಂರಕ್ಷಕ' ಪ್ರಶಸ್ತಿ ನೀಡಲಾಗಿದೆ.
ಶ್ರೀ ರಾಮಚಂದ್ರ ರಾವಜಿ ಅವರ ಜೀವನ ಮತ್ತು ಸಾಧನೆ:
ಶ್ರೀ ರಾಮಚಂದ್ರ ರಾವಜಿ ಅವರು ಬಾಗಲಕೋಟ ಜಿಲ್ಲೆಯ ಹುನಗುಂದ ತಾಲೂಕಿನ ಅಮರಾವತಿಯಲ್ಲಿ ಜನಿಸಿದರು. ಅವರ ಪ್ರಾಥಮಿಕ ಮತ್ತು ಮಾಧ್ಯಮಿಕ ಶಿಕ್ಷಣವನ್ನು ಹುನಗುಂದದಲ್ಲಿಯೇ ಪೂರ್ಣಗೊಳಿಸಿದ ನಂತರ, ಅವರು ಅರಣ್ಯ ಇಲಾಖೆಯಲ್ಲಿ ಸೇವೆ ಸಲ್ಲಿಸಿದರು. ಅವರ ವೃತ್ತಿ ಜೀವನದ ಬಹುಭಾಗವನ್ನು ಶಿವಮೊಗ್ಗದಲ್ಲಿ ಕಳೆದರು. ಅವರು ಶಿವಮೊಗ್ಗದ ವಾಸಿಯಾದ ಶ್ರೀಮತಿ ಪ್ರೇಮಾ ಅವರನ್ನು ಮದುವೆಯಾಗಿ, ಅಲ್ಲಿಯೇ ನೆಲೆಸಿದರು. ಅವರಿಗೆ ಸ್ಮಿತಾ ಮತ್ತು ಸ್ವಾತಿ ಎಂಬ ಇಬ್ಬರು ಹೆಣ್ಣು ಮಕ್ಕಳಿದ್ದಾರೆ, ಇವರು ಶಿವಮೊಗ್ಗ ಮತ್ತು ಚಿಕ್ಕಮಗಳೂರಿನಲ್ಲಿ ಉನ್ನತ ಶಿಕ್ಷಣ ಪಡೆದು, ಈಗ ತಮ್ಮ ಪತಿಗಳೊಂದಿಗೆ ಸುಖೀ ಜೀವನ ನಡೆಸುತ್ತಿದ್ದಾರೆ.
ಅರಣ್ಯ ಸಂರಕ್ಷಣೆಯಲ್ಲಿ ಅವರ ಕೊಡುಗೆ:
ಶ್ರೀ ರಾಮಚಂದ್ರ ರಾವಜಿ ಅವರು ಅರಣ್ಯ ಇಲಾಖೆಯಲ್ಲಿ ಸೇವೆ ಸಲ್ಲಿಸಿದ್ದರಲ್ಲದೆ, ಅರಣ್ಯಗಳ ರಕ್ಷಣೆ ಮತ್ತು ಅಭಿವೃದ್ಧಿಗೆ ಅಪಾರ ಶ್ರಮ ವಹಿಸಿದ್ದಾರೆ. ಅವರು ಶ್ರೀಗಂಧ ಮತ್ತು ಇತರೆ ಮೌಲ್ಯವಾನ್ ಮರಗಳ ಕಳ್ಳಸಾಗಣೆಯನ್ನು ತಡೆಗಟ್ಟುವಲ್ಲಿ ಪ್ರಮುಖ ಪಾತ್ರ ವಹಿಸಿದ್ದಾರೆ. ಅವರ ಈ ಅನುಪಮ ಸೇವೆಯನ್ನು ಗುರುತಿಸಿ, ಸಾಂಸ್ಕೃತಿಕ ಅಕ್ಯಾಡೆಮಿಯು ಅವರಿಗೆ 'ಅರಣ್ಯ ಸಂರಕ್ಷಕ' ಪ್ರಶಸ್ತಿ ನೀಡಿ ಗೌರವಿಸಿದೆ.
ಸಮಾಜ ಸೇವೆಯಲ್ಲಿ ಅವರ ಪಾತ್ರ:
ನಿವೃತ್ತಿ ಹೊಂದಿದ ನಂತರವೂ ಶ್ರೀ ರಾಮಚಂದ್ರ ರಾವಜಿ ಅವರು ಸಮಾಜ ಸೇವೆಯಲ್ಲಿ ತೊಡಗಿಸಿಕೊಂಡಿದ್ದಾರೆ. ಅವರು ತಮ್ಮ ತಾಯಿಯವರ ನೆನಪಿಗಾಗಿ ಕುಂಸಿಯಲ್ಲಿ 'ಚನ್ನಮ್ಮದೇವಿ ಹಿರಿಯ ಆಂಗ್ಲ ಪ್ರಾಥಮಿಕ ಶಾಲೆ' ಸ್ಥಾಪಿಸಿದ್ದು, ಇದನ್ನು ಈಗಾಗಲೇ 12 ವರ್ಷಗಳಿಂದ ಯಶಸ್ವಿಯಾಗಿ ನಡೆಸಿಕೊಂಡು ಬರುತ್ತಿದ್ದಾರೆ. ಅವರ ಸೇವಾ ಮನೋಭಾವ ಮತ್ತು ಸಮರ್ಪಣೆಗೆ "ಆಡು ಮುಟ್ಟದ ಗಿಡವಿಲ್ಲ, ರಾಮಚಂದ್ರ ರವರು ಮಾಡದ ಕೆಲಸವಿಲ್ಲ" ಎಂಬ ಗಾದೆ ಸಾಕ್ಷಿಯಾಗಿದೆ.
ಹಾರೈಕೆ:
ಶ್ರೀ ರಾಮಚಂದ್ರ ರಾವಜಿ ಅವರ ಸೇವೆ ಮತ್ತು ಸಾಧನೆಗಳು ಮುಂದುವರೆಯಲಿ ಎಂಬುದು ನಮ್ಮೆಲ್ಲರ ಹಾರೈಕೆ. ಅವರಂತಹ ಸಮರ್ಪಿತ ವ್ಯಕ್ತಿಗಳು ಸಮಾಜಕ್ಕೆ ನೀಡುವ ಪ್ರೇರಣೆ ಮತ್ತು ಮಾರ್ಗದರ್ಶನವು ಯಾವಾಗಲೂ ಅಮೂಲ್ಯವಾಗಿದೆ.
ವರದಿ: ಡಿ.ಪಿ. ಅರವಿಂದ್